O Meghdoot Kab Aaouge (O Meghdoot!! when thou shall come?)
Mahakavi Kalidas ko Samarpit...
(Dedicated to the great Poet Kalidas)
_________________________________________________________________________
Kab aaoge...
ghoonghat chehre pe kheenche,
haathon ko maathein se lagaaye,
ek banjaare premi ki aas dekhtee wo sookheen aankhein,
khaali aashmaan aur banjar-si dharti ke beech samay kaatate,
wo honth, palke jhapka, kuchh budbudaate,
aur kisi apratyaashit aagantuk ke aagaman ki aas liye,
har ek chhod nazar dauraate, thakte,
udas, nishwas, deewar se sir tikaaye, svayan se poochhte
ki kab aaoge...
O Meghdoot! kab aaoge?
wo vrishti sandesh kab laoge?
kya meri vyatha, vyatha nahi?
ya prem virah hin sab kuchh hai
dekho kaise marti bhoomi
jal bin til-til jalti bhoomi
kya panchhi-paudhon ka mol nahi?
ya prem praan par bhaari hai?
o thoda moh dikha jao
thoda raah bhatak kar aa jao
wo preyasi thodi-si roothegi
par usko tum ye batlaana
ki laankhon murjhaate jeevan ke liye
itna sa tyaag jaroori tha
jo aanshoon unke aur beh nikale
unse saanson ka behna jaroori tha
isse upar kya vinati-vinay
thodi karuna to barsaao
bas prem dua hin paaoge
O Meghdoot, jab aaoge!
O Meghddot kab aaoge?
_________________________________________________________________________
for Hindi script, read this