Ek Boond

Ek shaam, chaukhat pe baitha

main khawaab piro raha tha ki

ek baarish ki boond mere pairon se aa lagi

Maine puchha kaun hai tu

yun mujhse kyun hai aa lipti

wo dheere se muska kar boli

mera apna koi thaur kahan

kabhi nadiyaan mein, kabhi saagar mein

kabhi udkar upar baadal mein

aur aaj achaanak chhoda usko,

aa giri dharti ke aanchal mein

gar kismet ho, to mil jaoungi

main phir se behte paani mein

aur phir nadiya, saagar, baadal

yun hin chalti, zindegani mein

Khwaaish (Desire)

Ek dauṛ(race) hai kuchh paane ki, 
Kya chahiye pata nahi

Dusron ke aansuon pe, 
khushiyaan sabhi buni gayee

Phir bhi udaas hai ye dil, 
ghutan hai aur bechain man

Kabhi iss taraf, kabhi us taraf, 
hai daur thak gaya ye tan

Thukra diya jo paas tha, 
kuchh aur aur pane ko

Ab phans gaya bhanvar mein yun, 
nahi chhor koi jaane ko

Aye zindegi tu hin bata, 
kyun na-samajh itna hai dil

Ki kuchh aur paane ke liye, 
sab kuchh lutata jata hai,

Aur thak kar phir jo bhi mile, 
usme jhoothe muskurata hai

Zindegi ne kuchh soch kar, 
dheere se phir mujhse kaha,

Tu chahaton ko chhod de, 
aur dekh sab kuchh hai tera

Tu khwaishon ke dhund se, 
nikal ke saath chal zara

Hai Zindegi ye khushnuma, 
hai Zindegi ye khusnuma...

Zindagi Sifar hai (Life Sums up to Zero)

Zindagi Sifar hai, thi, aur rahegi...

jitne din, utni hin raatein

jitni dhoop, utni barsaatein

jitni khamoshi, utni hin baatein

jitni khushboo, utne hin kaaantein

jitni khushiyaan, utne gam hain

jitni chaahat, utni tadpan hain

jitni saanson mein hain aanhe

utni chalne ko hain raahein

jitni gulshan mein haryaali

hain utne hin daaman khaali

jitne maujon mein hain dhaare

utne sookhen se patwaare

jitni chaahat ki shitalta

utni nafrat ke angaarein

jitne gumsum si nigahein hain

utaa hin shor-e-sharaba hai

jitne bebas se rishte hain

utna hin jasn-e-bahara hai

jitni hai hansi, utne aanshu

phir bhi dil kyun na ye samjhe tu

ki ujaale mein chhipe hain andhiyaarein

har khushi mein dard ki hain lehrein

ek ghar to ek beghar bhi hai

hain jaam to sookhen lab bhi hain

ye waqt ki likhi kahaani hai

jisne kismet ke taraju mein

sabko hin barabar taul diya

ab jhoote aanshoo rokar bhi

kismat ko baithe kosh ke bhi

wahi paoge jo hai milti

kyunki,

Zindagi Sifar hai, thi, aur Sifar hin rahegi...